|
paese
|
parrocchia
|
ambiente
|
attività
|
||
|
|
|||||
 |
 |
 |
 |
 |
 |
 |
 |
 |
 |
 |
 |
 |
 |
 |
 |
 |
 |
 |
 |
 |
 |
 |
 |
[in dialetto]
a cura di Maria Damonte
Le persone che le lo ga visto cò i so oci, i ghe ne parla ancora cò nostalgia e cò ’na ponta de dispiasser, parché ’desso sto palasso no’l esisti più. In t’un grando spiasso de tera che feva parte de i niuvi fundi par la bonifica e risanamento, ’ndove che la laguna la gera trasparente come el velo e la posission incantevole, la siòra Contessa de Asarta, originaria de Fraforeano (Ud), inamorandose del posto e del paesagio che’l ofriva, la ga conprò un gran tòco de sto teren e in te’l 1901 la se ga fato costruì un meravejoso palasso (el vigniva ciamò anca castel) de stile svissero-olandese, che’I gera nostro vanto e atrassion par duti quìi foresti che i vigniva in te’l nostro paese. Oltre che a le tante stanse, el veva ’na veranda a quadrati de diversi culuri, e ’na toreta ’ndove che se podeva mirà duto el panorama cò le varie ìsole che le arichissi la nostra laguna. Duto intorno eI gera circondò de un parco pien de àlberi e aiuole cò fiuri meravejusi de ogni stiata, (qualità), in sto parco ghe gerà anca ’na vasca cò ’na bela ponpa, e par sintìo dì, vissin ghe gera ’na mesa colona de stile roman. Ricordo che me nono (classe 1889) el me conteva, e me lo ga confermò anca “nona Angelina Milocco” che el 24 Otobre de l’altro ano 1996, la ga conpìo ben 107 ani, conquistàndose el tìtolo de – dona più ansiana del Friul –, che la Contessa cò la torneva de Lignan, o da qualchi altro ziro fato col motoscafo, i fioi atrati da quel strano arnese che’l porteva ’vanti da sol la barca, sensa bisogno de vogà, i se ingrumeva a spetàIa e ela ’na volta desmontada la ghe butèva ’na manciada de mèse palanche, che le veva el valor de 50 schei a l’una, luri i sercheva de ciàpali sù, dàndose sbruntuni a rota de col: par che qualchi volta la li butissi anca passando par la strada, e qua se ripeteva la sèna par ciapà sù sti schei, col moto: “chi poI più, manco pianzi”. Cò l’andeva via de paese la dopreva “la carossa sensa cavài”, cussì la vigniva ciàmada la màchina che la gera par quìi tinpi ’na rarità.
1 | 2 
Ne l’Agosto del 1916, in piena guera, quando che’l ronbo de i aroplani nemici i svolasseva su la laguna e sul paese, la siòra Contessa, ’vendo fato fa soto el palasso anca de i soteranei, la ghe deva rifugio a la popolassion che la sercheva de riparasse dal pericolo de le bonbe, esercitando cussì concretamente la so religiosità. La zente del paese, anca par questa so disponibilità la ghe voleva ben e xe stò ’na sorpresa e un gran rincressimento quando che sùbito dopo la guera sto palasso la lo ga messo in vèndita. Questo el xe stò conprò e rivendùo diverse volte, in te’l 1949, par interessamento del Comun, el xe deventò “Casa Canonica”, drento el parco (no esistendo la television) d’istàe vignìva fato el cine a l’aperto, e de inverno al chiuso, ne la sala parochial che xe ’desso, cò l’intento de fa drami che vissi de i contenuti morali, dato che’l gera gestio da i preti, sto qua el se ciàmeva “Cinema Eden”, ma sta esperiensa la ga durò poco.
Naltre fioi che abitèvomo vissin, pur se i àlbeli i gera alti, e inoltre el gera circondò de grasìole de cana, in modo che no se vedissi par fora, metèvomo ingegnosamente soto el basamento del muro, un scagneleto, o ’na caregheta spajada che se ’ndeva a ciò in casa, gera anca chi che se rangeva cò ’na piera, e a cucut, vedevomo come che podevomo i cine che i vignìva fati.
Essendoghe tante stanse, una la gera deventada “scola de ricamo”, ’ndove che lé zòvanete de quel tenpo le ’ndeva a inpairà a "tignì l’ago in man", soto la diressione de suor Claudina, le più grande deventando sperte le se faseva la dota, che la ghe varissi servìo quando che le se sposeva. In te’l 1966, ’vendo bisogno de un teren par costruì un niovo asilo e daghe ’na degna abitassion ai dò preti che i abiteva drento el palasso, l’Amministrassion Comunal de alora la lo ga fato esaminà da ’na comission de esperti, essendo malandò e pericolante, fasendo i cunti, i ga concluso che par metèlo a posto se varissi speso de manco fasendolo niovo, e cussì el xe stò demolìo. ’Desso nel posto del “Palasso de Asarta” ghe xe el niovo asilo sul stile de sti tinpi, piere a vista e semento. Sul vecio rimesso a posto xe la “Canonica”. Nel nùmaro de Agosto 1990, Claudio D. s’un articolo publicò su “Voce della laguna” el nostro Boletin Parochial e lo definissi, dopo vè descrito le altre sie, “La setima maraveja de Maran”. Par le fameje ghe xe ancora qualchi quadro fato cò arte, dal nostro pitor local, Mario Della Ricca, quando che sto palasso el gera ancora in vita, vardàndolo, senpre el gava fora parole come... “Che bel!!! Pecó che’l xe stò butò zo, se podeva fa un musèo, se podeva fa...”. Se podeva, forsi se podeva, ma ormai no se torna più indrìo.
1 | 2
Rimaniamo a disposizione degli aventi diritto, con i quali non è stato possibile comunicare, per le eventuali involontarie omissioni o inesattezze nella citazione delle fonti delle immagini riprodotte.
